മൗനം

അന്യായമായ വധക്കേസില്‍

അവനെ ചോദ്യം ചെയ്തു.

സത്യത്തിന്റെ യഥാര്‍ത്ഥ

രൂപം അനാവൃതമാക്കാന്‍

ഇനിയും ഒരു മുഖംമൂടി കൂടി

പിച്ചിച്ചീന്താനുണ്ടെന്ന

അവരുടെ വാദം കേട്ട അവന്‍

ഒരക്ഷരം ഉരിയാടിയില്ല;

മൗനം, പ്രതിഷേധത്തിന്റെ

അടങ്ങാത്ത സ്വരം.

പ്രകോപകര്‍ ഉയര്‍ത്തിയ

ആക്ഷേപങ്ങള്‍ക്ക്

പുച്ഛം അണിയിച്ച് അയാള്‍

പുതു കവിതകള്‍ രചിച്ചു;

പക്ഷേ, ആക്ഷേപിച്ചവരോട്

അയാള്‍ക്ക് ഒന്നും പറയാനുണ്ടായിരുന്നില്ല.

നിങ്ങളായി, നിങ്ങളുടെ പാടായി

എന്ന ഭാവം നിശ്ശബ്ദമായി

നിശ്ശബ്ദത ജനിപ്പിച്ചു.

മൗനം, പരിഹാസ്യാവഹേളനത്തിന്റെ

ബലിഷ്ഠ മാര്‍ഗ്ഗം.

ലജ്ജാവിവശയായി നില്‍ക്കുന്ന

അവളോട് ചോദിച്ചു:

'ഉറപ്പിക്കാമല്ലേ?'.

അവളുടെ ചുണ്ടുകള്‍

നിശ്ചലമായി നിന്നു;

മൗനം, സമ്മതവിളംബരം

നടത്തുന്ന നാദം.