കണ്ണുകള്‍ അടച്ചു കൊള്‍ക

നിന്റെ ഉല്‍പ്പത്തിയുടെ ഓര്‍മകളില്‍

നീ അഹങ്കരിക്കുന്നു.

നിന്റെ കണ്ണുകളെ ബാധിച്ച

കറുപ്പ് മായ്ച്ചു കളഞ്ഞ്,

നൈരാശ്യത്തിന്റെ

വരണ്ടുണങ്ങിയ പുല്‍മേടില്‍

തളര്‍ന്നുറങ്ങുന്ന, എന്റെ

നെഞ്ചകത്തിലേക്ക്

പതുക്കെ നോക്കുക.

ശുഭ്രത പരിചയപ്പെടാത്ത

അതിന്റെ വൈരൂപ്യത്തിലേക്കല്ല;

നീറിപ്പുകയുന്ന രക്തക്കട്ട

വിറങ്ങലിച്ചു കിടക്കുന്നിടത്തേക്ക്.

നിന്നെയും നിന്റെ ലോകത്തെയും

ആശയോടെ നോക്കുന്ന

ഒരു കൊച്ചു ലോകമുണ്ടതില്‍.

വേണ്ട, നിന്റെ

കണ്ണുകള്‍ അടച്ചു കൊള്‍ക...